Un álbum delicioso e cheo de amor, unha homenaxe ás avoas, ás mulleres que sostiveron o mundo.
Os recordos, os afectos e a calma enchen o día dunha neta que pasa o verán coa súa avoa na casa da aldea. Días de facer queixo, de traballar a terra, de tecer mantas de retallos... Días de aprendizaxe, asombro, descubrimento, de paciente espera e profundos afectos.
Unha obra que nos traslada no espazo e no tempo a través da sempre curiosa e observadora mirada da infancia. Unha historia tenra e chea de amor que anima a lectores e lectoras a apreciar o valor da cultura tradicional, conservada xeración tras xeración, e a pór en valor as cousas importantes da vida.
